بانوراما الفيلم الاوروبي

ابتدى النهاردة يوم 16 وح يخلص يوم 22 ديسمبر

البرنامج كامل هنا

انا بانعي اليكوا بمنتهى الاسف ان المهرجان في سيتي ستارز، حيث المصريين الجدد (جرسونات قصيرين ورفيعين بشكل سريالي) وحيث كل انواع الجايز في كل القهاوي، وتدخل بقى المهرجان تلاقي كل المكتئبين في البلد جايين يروحوا عن نفسهم

انا ما شفتش النهاردة غير فيلمين، الفيلم الانجليزي

This is England

حلو قوي، قوي قوي، بيتكلم عن النازيين الجدد ومش ح افسر اكتر من كده عشان ما احرقش الفيلم، بس انساني وجميل

وفيلم اسباني اسمه الاحضان المكسورة بتاع بنلوبي كروز ما عجبنيش ابدا، حسيت انه فيلم هندي، نصيحة شوفوا الفيلم الانجليزي ضروري، انا لو جات لي فرصة اشوفه تاني ح اشوفه تاني ان شاء الله، وفيه فيلم ان شاء الله لازم ربنا يقدرني واشوفه اسمه الزمن الباقي فرنسي - فلسطيني

الحفلات من عشرة الصبح لحد حفلة تسعة بالليل، تسعة ونص يعني كده عشرة انتوا عارفين، فيه ترجمة طبعا على الافلام

طبعا مفهوم ان الفيلم الاوروبي مختلف خالص عن الفيلم الامريكي عشان بس ما تروحوش بتصور معين، بيبقى مبني على المشاعر مش على الاحداث، متهيالي احنا واخدين شوية على الفيلم الانجليزي

إبراهيم عيسى يكتب: حوار حول الجدار

ده اللنك

وده المقال

حين نتحدث عن غزة أرجو أن نتمتع جميعا بالمسئولية الأخلاقية ونتذكر أننا نحن الذين واللاتي ضيعنا غزة!


مصر حتي الخامس من يونيه 1967كانت تعين حاكما مصريا علي غزة بمثابة المحافظ يتولي شئونها ويدير أحوالها وتحمي مصر حكومة وشعبا وجيشا، غزة التي كانت تقع تحت سلطتها ومسئوليتها منذ نكبة 1948، مع صبيحة يوم خمسة يونيه تسببت مصر -وهو موضوع يطول شرحه ويتسع جرحه - في ضياع غزة من أيدي العرب!


إذن يستدعي الأمر بعضا من اللياقة والاهتمام والشعور بالمسئولية والحس الأخلاقي حين نتعامل مع غزة سواء علي المستوي السياسي أوالإعلامي والشعبي وحتي الأمني، فلابد أن تكون غزة وشعب غزة زيادة علي فلسطين كلها محل رعاية وعناية مصرية عميقة وواجبة!


الثابت فعلا الآن أن مصر تتجه بروح التخلي عن غزة إلي سيناريو التخلص من غزة!


مصر تبني جدارا حاجزا بين رفح وغزة يبدأ بعمق ثلاثين مترا تحت الأرض ومكون من حديد فولاذي، عندي سؤال هامشي لعله لا يزعج البعض: هل يا تري يتم الاستعانة في بناء جدار الحديد الفولاذي بين مصر وغزة بحديد عز؟، والواضح أن هذا الجدار جزء من الاتفاق الأمني المصري الأمريكي الإسرائيلي الذي عقدته عقب حرب إسرائيل الأخيرة علي غزة السيدة كوندوليزا رايس - طيب الله ثري ولايتها - حين كانت وزيرة خارجية أمريكا وقد بارك الاتفاق باراك أوباما بعد توليه الرئاسة!


النظام المصري عايز يخلص من ضجيج تهريب السلاح والغذاء والبضائع عبر أنفاق يحفرها الفلسطينيون من غزة إلي رفح، ويريد أن يثبت للأمريكان والإسرائيليين أنه ملتزم بالاتفاق ضد الأنفاق ويرفع يده عن أي مسئولية عن أي طلقة رصاص واحدة علي إسرائيل تنطلق من غزة!


إذن غزة بين جدارين، جدار بنته إسرائيل وجدار تبنيه مصر لتصبح غزة فعلا سجنا كبيرا محاصرا من العدو والشقيق، ومطلوب من شعب غزة الاستسلام الفوري وتسليم الحكم إلي فتح وأبومازن حتي تهنأ مصر وترتاح إسرائيل وتطمئن أمريكا!


بالمناسبة حماس في غزة لا تطلق رصاصة ولا تلقي قنبلة ولا ترمي صاروخا علي إسرائيل ولا تقذف جنود الصهاينة ولا تغير علي مستوطنة ولا تدمر دبابة إسرائيلية، فتعطلت المقاومة واكتفت بخطب جوامع وخطابات مؤتمرات احتفالية تؤكد فيها أن البندقية لم تسقط لكن البندقية للأسف أيضا لم تضرب!


طبعا مبررات المدافعين عن بناء حكومتنا لجدار بيننا وبين غزة تكمن في أن هذه هي مصلحة الأمن القومي المصري!


وكأنهم بهذه الحجة ينهون أي مناقشة ويصعقون أي معارضة، لكننا في الحقيقة لا نعرف ما الأمن القومي لمصر؟ ثم من يحدده؟


زمان كان الأمن القومي لمصر هو محاربة ومواجهة وملاحقة إسرائيل علي الأرض المصرية وفي فلسطين وفي كل شبر في العالم، ثم ارتد الأمن القومي وصارت إسرائيل صديقا حليفا!


الأمن القومي ملزم قطعا لكل مواطن لكن في الدول المحترمة والديمقراطية والتي لا يحكمها نظام مستبد يجلس علي الحكم تزويرا وتزييفا تكون مسألة الأمن القومي محددة ومفهومه ومتغيراته وثوابته موضع مناقشة شعب أوممثليه ومن ثم يستوجب الاحترام من الجميع، فمفهوم الأمن القومي يجب أن يصدر عن إجماع أغلبية ديمقراطية حقيقية وليس عافية ولا غلبة ولا رغما وفرضا من مجموعة حول حاكم أو رئيس بين حاشية!


الأمن القومي في البلد الديمقراطي تقرّه قواعد مصانة بالأغلبية أوبإجماع الشعب وبرقابة الأمة بحيث لا يسمح بلد لحاكمه أومسئوليه بالتكييف الآمن للأمن القومي، ولا استثمار احترامه والالتزام به في أبعد من غايته ولا استغلال الأمن القومي في إسكات المعارضين والرافضين!


ثم هناك لجان برلمانية ضمن مجالس تشريعية منتخبة انتخابا حرا ونزيها وبتعبير كامل عن إرادة الشعب تتابع وتراقب القائمين علي تنفيذ آليات وتداعيات الأمن القومي ومن ثم لا يخطف أحدنا الأمن القومي ويتم تعريفه بالهوي وتنفيذه بالرغبات وتلوينه وتليينه حسب الأهواء السياسية والحسابات الضيقة والشخصية!


من هنا فإن الادعاء بأن بناء جدار بين مصر وغزة هوأمن قومي أمر يستحق الاحترام، لكن ليه أمن قومي؟


خلاص فهمنا إننا مواطنون لا شأن لنا وننكتم ونخرس خالص، ماشي، لكن هل يعرف نواب الشعب بدواعي هذا الجدار وبأسبابه وبتكاليفه، ومن يدفع نفقاته، وهل هو ممول من الأمريكان أم أنه مصروف عليه من المالية المصرية، وهل أعباؤه المالية تتحملها موازنة مثقلة ومكسورة مع أزمة مالية كاسرة لظهر اقتصادنا واقتصاد العالم،؟! صحيح أعرف أن نيابة نواب الشعب عن الشعب مشكوك فيها قطعا وأن معظمهم تحت التصرف الحكومي، ومع ذلك فإن مستوجبات الشكل الديمقراطي لم تحصل ولم تتحقق أصلا رغم أن موضوعا مثل هذا لن يستغرق ثلث ساعة لتمريره في البرلمان أولتفسيره تحت القبة فسوف يمالئ الجميع ويهلل ويبارك ويلعن سنسفيل اللي بيجي لنا من غزة مع تأييد من برامج الفضائيات الخاصة والمخصوصة الذين سيلعنون مصائب غزة والفلسطينيين ويرفعون شعاراتهم الراقية والأنيقة من عينة «وإحنا مالنا بقي بالفلسطينيين وغزة.. إحنا عايزين ناكل»! كما لا أظن أن الرأي العام المصري سوف يرفض بناء جدار بيننا وبين غزة فهومهيأ تماما نتيجة عقود من غسل المخ للولع بالقصة السقيمة بتاعة إن العرب بيحقدوا علينا وكفايانا تضحيات عشان فلسطين (وهي خزعبلات كلها لا تصمد أمام مناقشة عاقلة لكن لاعقل في هذه القصة، بل وله غرامي هائم بالغوغائية ونفخ الذات ولعب دور الضحية ).


إذن يمكن للحكم في مصر الحصول علي تصفيق حاد تأييدا لبناء الجدار ومع ذلك لم يلجأ للشعب ولا لمجلس الشعب ولا حتي أعلن عن المشروع بشفافية وبوضوح وكأنه سر مقدس مع إن الإسرائيليين الصهاينة هم الذين أذاعوه وطبعا لا شيء في هذه المنطقة لا يخضع لتسليط يومي عبر كل ثانية في الأربع وعشرين ساعة من الأقمار الصناعية التجسسية الأمريكية والإسرائيلية، كما أنه من المستحيل وفق قواعد التنسيق الأمني بين مصر والأمريكان والصهاينة كذلك مع القوات الدولية الرابضة في المنطقة أن يتم بناء جدار بشكل سري خفي!


المتأمل لآلية وطريقة بناء الجدار الإسرائيلي الحاجز مع غزة والقطاع والجدار المصري الحاجز مع غزة يكتشف أن الدولة العبرية ديمقراطية مع شعبها تماما، فقد أعلنت عن المشروع وطرحته علي الكنيست وتداولته وسائل الإعلام، بل سمحت للمئات بل للآلاف من الإسرائيليين أنفسهم بالاعتراض علي بنائه بالمظاهرات والوقفات الاحتجاجية وبمحاولة إعاقته وبمقاطعة الشركات التي تبنيه، بينما في مصر هو سر من الأسرار وهو عمل كاتم الصوت وهوأمن قومي بمفهومه الذي يعني أن نخرس ونسكت ونترك هذه الموضوعات للكبار الأوصياء!


لكن دعني أتخيل أن مصر بدلا من أن تبني جدارا قررت أن تدفع حركة الاستثمار وتكسب فلوسا من غزة وشعبها!


ها هل أسالت سيرة الفلوس لعاب وشهية السادة رجال الأعمال الذين يحكموننا والذين يصدعون دماغنا عن ضرورة فتح باب الاستثمار وأن ننسي شعارات الأمة العربية الواحدة والنضال من أجل تحرير فلسطين ونتفرغ لتحرير التجارة؟!


طيب بالعقلية الربحية النفعية المادية الانتهازية نفسها التي يحبها مسئولونا (بينما حتي مبيفهموش فيها كويس )، لماذا لم تحول مصر منطقة غزة وسوقها المفتوحة والخصبة مرتعا ومسرحا للمنتجات المصرية، لماذا لم نجعل من غزة سوقا مصرية رائجة ومفتوحة تدر علينا ملايين الدولارات يوميا بتصدير كل ما تحتاجه غزة من دواء وغذاء وأجهزة كهربائية ومواد خام ومنسوجات وكتب وأدوات مكتبية ومنتجات جلدية وأسمنت وأسمدة وألف صنف وصنف؟!، فهي سوق تعج بالراغبين في الشراء ولا يستطيع أي كائن منافستك في هذه السوق وهي سوق تحبك وتريدك وتطمئن إليك وهي سوق تضم تجارا في منتهي الشطارة والمهارة وهي سوق قريبة ومصاريف شحن بضائعها منخفضة جدا وهي سوق مفهوم زبونها ومعروف احتياجاته،(كم مرة كررت كلمة سوق لأسوق المغرمين بالبيع إلي الاقتناع !!) فهمنا إن النظام في مصر لا يريد أن يدبس نفسه مع غزة! وأدركنا أنه لا يريد فتح معبر رفح!


طيب افتحه واستخدم كذلك المعابر الأخري لتجارتك وفلوسك وبضائعك وتصديرك،

لماذا يصمم النظام بحصاره لغزة أن يلجأ الغاوون للأنفاق والتهريب، هل لأن التهريب مثلا يفيد المسئولين و(التجار) أكثر؟

وقبل ما أمشي أحب أكرر سؤالي: هل يا تري الجدار الحديدي الفولاذي الذي تبنيه مصر حاجزا بين رفح وغزة يستخدم حديد عز الدخيلة ولاَّ حديداً مستورداً؟!
--------

وانا عندي سؤال، هو تكرار السؤال ده وراه حاجة؟ مجرد سؤال بريء

ملحوظة

انا مش عايزة الواد ده يحصل له حاجة

تحت اي مسمى مش عايزة يحصل له حاجة، انا عارفة ان السلاب وفتحي سرور ح يبيعوه عند اول مزنق، بس الواد ده لو اتقبض عليه وللا اتأذى بأي شكل من الاشكال ح اعمل حملة لاعتقال علاء مبارك اللي هييج الناس ودعاهم للتظاهر والشغب وعمل ازمة دبلوماسية مع دولة بينا وبينها معاهدات ومواثيق ونتيجة لتحريضه 35 من رجال الامن اصيبوا وكل ده عشان ماتش كورة وكام ازازة مية بلاستك اتحدفت عليه 
الواد ده بيدافع عن فلوسه وحقه، وبيوصل صرخة الناس، يعني من الاخر كده اي تهم من بتوع التحريض وزعزعة السلم والامن والكلام الهجص ده اللي ما حيلتهمش غيره اولى واحد بالاتهامات دي علاء مبارك نفسه
يا تسيبوا الواد وماحدش يمس منه شعرة،يا اما ويمين الله يا انا يا علاء مبارك في البلد دي، ح اتفرغ له واسخر له حياتي، يتقبض عليه هو كمان وينضرب في القسم زيه زي اي "قلة مندسة" بتحرض الناس على الشغب

بس هه

جدار ذو لا مؤاخذة القرنين

اكيد الدولة اللي تقبل ان دولة تانية تيجي تبني عندها جدار زي ده من غير سبب واحد واضعع غير تجويع الاطفال وحرمان المرضى من الدوا تبقى عندها قرنين، ومعلش بقى مدام احنا ساكتين يبقى كل واحد فينا عنده قرنين برضه

الصورة من هنا

ويا عيني الاستاذ فهمي هويدي بيقول انه مش مصدق اللي بيحصل هههههه عارفة انا الاحساس ده، بس انا الحمد لله خفيت

عموما افتكروا الكلمتين دول: مش ح يحصل طيب ولا خير. بس لذو القرنين لوحده، كل اللي استخفهم واطاعوه

ولقد انتصرنا على الكافرين

والله الشعب ده محتاج حرب، بيقول لك انابيب البوتجاز اسلحة بيولوجية اه وربنا قال كده

بس انا متعاطفة مع بتوع عزبة الهجانة في انهم ما يسكتوش لما بيوتهم تتهد، ومتعاطفة طبعا لما يضربوا الشرطة، ومن غير سبب كده لوجه الله، مش لابسين الطاقية ليه

انما ان جيتوا للحق انا حاسة انها ح تتلم بسرعة وح يراضوا السكان وشعرة مبارك اللي شعرة معاوية ما تجيش فيها حاجة ح تطلع لنا، ليه بقى، لان قالوا على التويتر ان الناس كانت بتهتف: انت فين يا جمال

لا مش جمال عبد الناصر جمال مبارك

ودي اسمها حاجة كده ناشفة، زي ما واحدة يبقى عينها من واحد وترمي بلاها عليه كده، انت فين يا جمال؟ هو ايه يخصه جمال؟

الاغنية دي معبرة جدا عن وصف الهتاف ده

طبعا خالص اعتذاري للي تحمسوا وحسوا ان البلد بتتغير، يارب ياخويا يارب، بس بلاش الامل عشان ما نتصدمش بس زي كل مرة

هو فيه حالة فلتان دي حقيقة، لكن ثورة؟ ما اعتقدش

دي فيديوهات بتاع الاسلحة البيولوجية انابيب الغاز

بس انا اتكيفت قوي من "هجمات الحكومة المصرائيلية الكافرة" دي ما الجزائريين طلعوا ملهمين اهم
لا حول ولا قوة الا بالله، الناس حاطة شقاها في الشقق دي يا ناس، لا حول ولا قوة الا بالله، ورايحين للسلاب؟ ده واحد اسمه السلاب السلاااااااااااااااب
هههههههههههههه الواد بيقول الحكومة بتخش ما بيفهموش، ههههه يا حبيبي انت لسة واخد بالك انهم ما بيفهموش؟ امال احنا بنقول ايه بقالنا سنين
ربنا يحميه الواد ده... ح يودي نفسه في داهية زي علي طه بتاع القاهرة تلاتين

دماااااغ

بالمناسبة السعيدة دي، بنشكر الاخت فنون (بكيزة اسمها الحركي) اللي شرفت ونورت، وزقتني زق عشان اخرج من الاكتئاب وناخد صحابنا ونخرج

ياااااا انا ما كنتش عارفة اني محتاجة الخروجة دي غير لما خرجتها

عملت دماغ حقيقي، ده انا بقالي كتير ما خرجتش اتفسح، وجيت عاملة دماغ حتى نزلت التعليقات من غير ما اقراها عشان ما انكدش على نفسي

مشتكرة يا فنون

خدوا اعملوا دماغ، واهداء خاص لبكيزة

ودي مادو اهداها لي الصبح

جميلة بو حريد بتستلف؟

Mother Djamila


SOS from Mother Djamila

عيييب عيييييييييب عييييييييييييييييييييييييييييب

اسفخص على دنيا كلها لما جميلة بو حريد تحتاج يوم تستلف عشان تاكل، واللي جاب لي الخبر مواطن مصري، وبصرف النظر عن وجهة نظره في اننا لازم نعمل حملة لجميلة بو حريد "عشان نطلع احسن منهم" ههههههههههههه اه يا قلبي يانا، هو احنا بنلعب في الفصل هنا؟ شوف الناس بتقول ايه وده بيقول ايه؟ مافيش حد فينا احسن لما ست الناس تعيش مش لاقية تاكل، دي جزمتها بينا كلنا، مافيش حد في العالم العربي كله يستاهل يتبص في خلقته لما جميلة يوصل حالها كده، هي جميلة دي جزائرية يا ناس؟ جميلة اللي كسفت رجالة العالم (ايام ما العالم كان فيه رجالة) تخص الجزائر بس؟ ما تخصش كل انسان عربي؟ هو لو النيل نشف تبقى مشكلة مصر والسودان بس؟ هو فيه اغنى من العرب؟ الله، بتروح فين الفلوس يا عم الامور انت وهو؟ بتتصرف على هيفا واخواتها اللي نافخين كل حتة فيهم عند بتاع الكاوتش لما شوية وح نلاقيهم طايرين في الهوا

يعني ايه؟ يعني ايه جميلة تضطر تستلف وللا حتى تضطر تطلب زيادة معاش؟ يعني ايه انا مش فاهمة يعني

اه.. انا قلبي وجعني قوي... دي صعبت على مواطن مصري اللي بيحب هتلر

ثانية واحدة بس.. هي الدنيا فيها حاجة مش مظبوطة حاصلة وللا انا اللي بقيت حساسة زيادة؟ اللي بيحصل ده طبيعي؟

زنوبيا طيرت لي دماغ موزار

بقى انا عمالة الصم في نفسي قوم زنوبيا تبعت لي الخبر ده؟ اقروا، اشمعنى انا؟

مش كفاية ضياء رشوان خسر ومامتي زعلانة؟

ايه سفن ايه

ده المشروب الجديد للصحفيين

مكره محمرأ احمق كسب الاستنخابات!!!! لما الاي كيو بتاع الصحفيين سمح لهم ينتخبوا مكرم يبقى ارحموا الشعب الغلبان ده على الاقل، اللي بيعمله ده اقل واجب اذا كانت دي النخبة او النغبة بتاعته
اه.. ونسيت اقول لكوا زي ما قلت لهم في التويتر، من هنا ورايح مالكوش عندي غير البصة دي

من اعماق اعماق قلبي...وخلوا بالكوا انا باتحول بعد البصة دي وباخضر وانيابي بتطلع

يارب ضياء رشوان ينجح بكرة

يارب ضياء رشوان ينجح بكرة
يارب ضياء رشوان ينجح بكرة
يارب ضياء رشوان ينجح بكرة
يارب ضياء رشوان ينجح بكرة
يارب ضياء رشوان ينجح بكرة
يارب ضياء رشوان ينجح بكرة
يارب ضياء رشوان ينجح بكرة
يارب ضياء رشوان ينجح بكرة
يارب ضياء رشوان ينجح بكرة
يارب ضياء رشوان ينجح بكرة
يارب ضياء رشوان ينجح بكرة
يارب ضياء رشوان ينجح بكرة
يارب ضياء رشوان ينجح بكرة
يارب ضياء رشوان ينجح بكرة
يارب ضياء رشوان ينجح بكرة
يارب ضياء رشوان ينجح بكرة
يارب ضياء رشوان ينجح بكرة
آآآآآآآآمين
والا بقى الصحفيين يروحوا يشوفوا لهم شغلانة ويسيبونا في حالنا
اكلوا دماغنا

فتملك الغيط من الاسد وقال له يا ابلة ويلوك ويلوك ويلوك

نتيجة العلاج

بصوا بقى، اتضح انه صح موضوع موزار بيعالج ده، بس جرعة مكثفة

من الصبح وانا مدوراه، ولما نزلت شغلته في العربية، هو انا مش عارفة كنت باعمل ايه وانا باسمعه في العربية لان الناس كانت بتبص لي، بس لاحظت اني مش باسوق بعصبية ولا حاجة، وفعلا الحالة في تحسن

نصيحة والله، موزار يمخمخك بالليل ويعالجك بالنهار

بس مش تروح تسمع الريكويام اللي عملها لتأبينه :) اسمع الكونشيرتو السيمفونيات كده يعني

هو امور، انا باحبه، لازم اكيد كان راجل طيب عشان يعمل مزيكا كده

بيقولوا ده بيعالج الاكتئاب

 شوفوا كده، يمكن تعالجكوا انتوا، انا باحب دي قوي، قوي قوي بس غالبا ما عالجتنيش:

انا دي بتخليني اعيط لما باتفلق من العياط..لو نفعتكوا يبقى انا اللي فيا حاجة غلط^^
شوفوا دي كده، دي مشهورة طبعا، بس على بعضها خلتني اعيط برضه!



المفروض ان دي سيمفونية روحانية زمان كانت بتحسسني اني طايرة بس دلوقت برضه بتخليني اعيط



الخلاصة يعني ان موزار ده كان راجل محترم، الله يرحمه، ايه المزيكا دي؟ ده اكيد كان فيه قوة ما بتمليه المزيكا دي،الناس المتسأفة بتقول على اللي بيحبوا موزار من امثالي ان ذوقهم شعبي، ههههه يخرب بيت السآفة يا شيخ، لازم تسمع مزيكا مش فاهمها تقطع خلفك من آن لآخر عشان تبقى مسأف، طب هو ماله الذوق الشعبي؟ على ايتها حال، الراجل ده مات عنده خمسة وتلاتين سنة، لو كان بيعالج من الاكتئاب كان عالج نفسه، اديني عمالة اسمعه واعيط اهو على الله احصله

جدار فصل عنصري ما بين مصر وغزة

وانا جاية سمعت في اذاعة البي بي سي ان القوات الامريكية بتساعد الجيش المصري على بناء جدار ما بينها وبين غزة زي بتاع ذو القرنين كده، مغمق في قاع الارض ومرتفع الى عنان السماء والبي بي سي بتقول ان العملية دي سرية... بالظبط زي محطة المطار السري

ولسة.. ولسة

احنا مش عايزين نرحم حد ابدا ليه؟ لا بجد يعني، انا عايزة افهم وجهة النظر في القسوة وغلظة الحس والتناحة والبلادة اللي احنا فيها دي، ايه؟ لا بنرحم جوة ولا برة واذانا طايل شرق وغرب، ايه؟ ايه؟ الارض اليباب دي مش ناوية تجيبها البر ليه؟ ده احنا ربنا ح يسخطنا اربع جنيهات مخرومة ونبقى ماشيين في الشارع نشخشخ كده

خلاص، ماعدش فيها كسوف ياما اعملي معروف، الجدار من الفولاذ

يا حلاوة يا ولاااااد، والله وعشت وشفتك يامصر لما كبرتي واحلوتي وبقيتي نازية، بس النازيين كانوا فالحين في حاجة على الاقل

احسن يا حلوة.. احسن، خليك كده اشتري عداوة الخلق كلهم واللي خلقهم بالمرة واوعي تخلي عندك ذرة اخلاق ولا دين ولا انسانية، اوعي، احسن ده وحش على صدرك

برتولد بريخت في ايام النازي كتب:

"حقا أنني أعيش في زمن أسود.. الكلمة الطيبة لا تجد من يسمعها.. الجبهة الصافية تفضح الخيانة.. والذي ما زال يضحك.. لم يسمع بعد بالنبأ الرهيب.. أي زمن هذا؟"

وبما اننا في ايام نازي خايب وموكوس وحتى بيمارس نازيته على ناسه، وناسه بيمارسوا نازيتهم على بعض فواضح ان بريخت نفسه ما سمعش بالنبأ الرهيب: فيه نازيين اوحش واخيب وافشل واهطل واكثر قسوة من هتلر

انا دورت على الخبر في البي بي سي ولقيت لنك اهو

عموما هو مافيش امل، واحنا نتسخط، وانا عندي اكتئاب، لا موزار نافع ولا تشايكوفسكي نافع (انا مش مثقفة والعياذ بالله، انا كنت قريت انهم بيعالجوا الاكتئاب، خلوني قاعدة اعيط) ولا طبق الفول نافع ولا الافلام الكوميدي نافعة ومش عارفة اعمل ايه عشان اخرج من الاكتئاب ده لان امي مالهاش ذنب

افكر كده اعمل تلبينة يمكن تنفع... وللا ما تنفعش، ربنا يفرج عني بقى

السلطات المصرية تهدم مستشفى خيريا للإخوان

احسن.. بلا خيري بلا عماد

هم الاخوان ح يفضلوا يأكلوا اللي مجوعاهم الحكومة ويلبسوا اللي معرياهم الحكومة ويعالجوا اللي بتمرضهم الحكومة؟

ليه يعني؟ متجوزينها عرفي والورقة مع الحكومة وخايفين لتفضحهم؟ 

ما يسيبوا الجعانين والعيانين والعريانين يا يموتوا يا ياخدوا حقهم بدراعهم ووالنبي كفاية بقى دور هاني شاكر اللي الاخوان متقمصينه ده: حبايب قلبي.. ربنا يخليكوا ليا... ربنا ما يحرمنيش منكوا

هرونا.. لا عارفين يلاحقوا على الجعانين، ولا يخلعوا بنفسهم، ولا سايبين الناس تجوع لحد ما تخلص لنا الحكاية لوحدها وفوق البيعة بينضربوا ويتشتموا... الرحمة بقى هو تعذيب النفس ده هواية عندهم؟

بقالهم تمانين سنة هاني شاكر.. ما يجربوا صلاح بسيوني شوية

مرهم محروق فاز ازاي؟

مرهم محروق احلق فاز ازاي في انتخابات الصحفيين في الاعادة؟ ازاي يعني؟ ده كل المؤشرات كانت بتقول ان ضياء رشوان هو اللي ح يفوز!!!! ازاي يعني

هي حصلت انتخابات الصحفيين كمان؟ 

ماهو حاجة من الاتنين، يا الانتخابات اتلعب فيها يا صحفيين مصر... بلاش بقى دلوقت، لحد ما نتأكد ان الانتخابات ما اتلعبش فيها ابقى اقول الصحفيين ايه؟ ماهو مالهمش اي عذر غير ان يكون الانتخابات اتلعب فيها

غير كده يبقى مسجلين خطر ولازم يتقدموا للمحاكمة وياخدوا حكم بالاعدام حرقا بجاز وسخ

مسلمو سويسرا بيقولوا لكوا حلوا عن سمانا لجل النبي

 البوست ده انا كنت كاتباه في اول ما موضوع سويسرا ومآذنها حصل وبصراحة خفت انشره عشان كنت باتشتم على موضوع الجزائر ما كانتش طالبة اتشتم عشان الجزائر وسويسرا واتعامل كأني مسيحية بقى كمان، مش كفاية باتعامل على اني عربية؟
بس بعد ما مسلمين سويسرا قالوا لنا: احب على ايدكوا.. والنبي ما تدخلوا لنا في حاجة اتشجعت انشر البوست القديم



اولا: كامل مساندتي للمسلمين المقيمين في سويسرا حيث انهم مالهمش ذنب في كل اللي بيتحصل في بعض الدول الاسلامية ولهم حق يطالبوا بحقوقهم، لانهم ما سابوش بلادهم وهاجروا عشان يروحوا حتة تانية تعمل فيهم اللي كان بيتعمل فيهم في بلدهم، والارض لله، مش ملك حد، وكل انسان حقه انه يقيم في اي حتة من بقاع الارض ويرتاح فيها وياخد فيها كامل حقوقه مدام ما طردش حد من بيته ولا قتل حد عشان يقعد مكانه ولا دخل بقوات عسكرية ولا عصابات

ونصيحتي ليهم اثبتوا على موقفكوا، وطالبوا بحقوقكم وما تسكتوش، وخلفوا عيال كتير قوي، مش هم مش عايزين مآذن، خلاص، صلوا بقى في الشارع، ايوة، افردوا ورق جرايد وصلوا في الشارع كده، وعلى رأي امي، اقلعوا الشبشب قبل ما تدخلوا البيوت واملوا لهم الطرقة شباشب، واتوضوا وبلبلولهم الدنيا، وما تدنوش على المآذن، ادنوا في كل حتة، كل حتة تسمعوهم الادان، حتى اللي بيصلي في بيته يدن، واياك تسيبوا مواقعكوا وتهاجروا، واياك تبطلوا خلفة، واشتغلوا في كل حاجة، واياك تعيشوا على الاعانة، اشتغلوا كلكوا، وابتكروا شغلانات، اعملوا لهم لقمة قاضي وبقلاوة وكشري عشان يجيلهم انتفاخ، وخلوهم كده منين ما يمشوا يشوفوا محجبات، في الشارع، في المحلات، في المستشفيات، في المترو، في البرلمان، في الاحزاب، وفي المدارس، اشتغلوا مدرسين وربوا لهم عيالهم، من اول الحضانة لحد اساتذة الجامعة، افرضوا نفسكوا في كل حاجة وفي كل دراسة وفي كل شغلانة واما نشوف منع المآذن بقى ح ينفعهم بإيه...انتوا اصحاب حق، اتمسكوا بحقكوا زي الرجالة، ما تجروش زي العيال وما تفشوش غلكوا في حد مالوش ذنب زي المرضى
مما يقودنا الى ثانيا
 

ثانيا: كامل الشماتة في المسلمين المقيمين في بعض الدول الاسلامية، اللي هي مصر بدون ذكر اسماء: ها؟ حسيتوا بالناس وللا لسة؟ زعلانين عشان مآذن ح تتهد... حسيتوا بقى باللي عايز يبني دار عبادة ومش قادر؟ ولما يصلي في بيته يتحرق عليه؟ حسيتوا بالناس وللا لسه؟ ما سمعتش انا صوت شيخ الازهر في اللي بيحصل في بلده قبل ما يتكلم عن سويسرا، ما سمعتش حد بيقول: حراااااااااااااااام حراااااااااااااااااااااام حرق بيوت ناس بتصلي، امال بيوت الدعارة يتعمل فيها ايه؟

المنافقين في الدرك الاسفل من النار ما يجيش واحد يعمل عبيط على حرق تلات بيوت في سنة ونص على ناس بتصلي  ولما يسمع عن منع المآذن في سويسرا يلطم ويصوت، يا مفتريين، يااااااااااااااا مفتريين، بقى لو مسلم اتحرق عليه بيت في امريكا عشان بيصلي كان ح يبقى نفس رد الفعل؟ يا عالم يا مفترية، بقى منع بناء دار عبادة ولما الناس تصلي في بيتها الجمهور يولع فيها والجرايد تكتب تقول: اصلهم استفزوهم لما صلوا في البيت، بقى ده يتساوى بمنع منارة؟ ده زي واحد بيقول لواحد انا ابني مات قوم التاني يقول له: وانا والله اتسرق مني تلاتاشر جنيه امبارح.

انا عايزة اسمع رأي الناس اللي بتقول ان المسيحيين في مصر "مستفزين" وسهنات ومية من تحت تبن ونفسهم يرجعوا مصر مسيحية وبناء على كده فمنعهم من بناء كنائس وحرقهم ده "رد فعل" طبيعي لاستفزازاتهم المستمرة! قال دول، قال دول بيعرفوا يستفزوا حد، انا عايزة كائن مريخي يجي يبص لي في وشهم ويسمع صوتهم اللي ما بيطلعش اصلا، طب خلاص، المسيحيين المصريين مستفزين، انا عايزة اعرف رأي اللي بيبرر منع دور عباداتهم وحرق بيوتهم فعلا بقى في منع المآذن، مجرد المآذن، لا هدوا جامع ولا منعوا بناء جامع، بس منظر المئذنة مضايقهم، يا ترى إيه رأيهم دلوقت؟ وإيه رأيهم إن ده جه بناء على طلب الجماهير؟ وإيه رأيهم ان الأوروبيين بيقولوا نفس الكلام: المسلمين مستفزين ونفسهم يحكموا العالم وبيقولوا ان الاسلام ح ينتشر في كل اسقاع الارض وكتر خيرنا سايبينهم عايشين وسطنا (فاكر انت كتر خيرنا دي ها؟) وبيشتمونا وهم مهاجرين وعايزين يغيروا ثقافتنا، والبلد بلدنا واحنا احرار فيها (فاكر؟)، والبيت بيت ابونا والغرب عايزين يتساووا بينا، وهم عايزين ينشروا الاسلام في اوروبا، ويرجعوا بلدهم يعيشوا فيها هم مش اهل للحضارة
همممم.. كلام عنصري نازي حقير، صح؟ طب سجل لنفسك بقى وانت بتتكلم عن المسيحيين المصريين عشان انت شكلك كده بتنسى انت بتقول ايه؟

اوروبا طول عمرها عنصرية، دي حاجة مش جديدة، اللي عملوه في السود عملوه في السكان الاصليين في اي حتة راحوها عملوه في اليهود وبيعملوه دلوقت في المسلمين
والمسلمين هم اللي بيروحوا لهم عشان يعيشوا حياة احسن، وهم عندهم فلوس
صحيح ان معظم فلوسهم مسروقة منا ان لم يكن كلها، صحيح هم شبعانين عشان احنا جعانين هم مرتاحين عشان احنا تعبانين، هم عليهم مسئولية مادية ومعنوية وادبية عن اللي احنا عايشين فيه، بس الهجرة مش الطريقة الوحيدة عشان تدفعهم تمن اللي هم عملوه وبيعملوه فينا
فيه اختراع اسمه مقاومة
فيه اختراع اسمه تغيير انظمة عميلة وابطال كل الاتفاقيات والعقود مع البنك الدولي وسحب كل الارصدة العربية اللي برة وتحمل بقى تبعات تحدي القوى العالمية اللي بتشفط قوتنا ولو ح نموت والمدينة الباسلة والكلام دهون
مش كل الناس تقدر على كده؟ صح.. اغلب الناس ما تقدرش على كده، ح نحارب العالم الاول كله؟
خلاص.. هم استعماريين وعنصريين..... وبيض وحلوين واغنيا ونسوانهم مزز، اللي عايز الدح ما يقولش... بخ
والناس ما خبتش حقيقتها علينا الناس صريحة

احنا بقى اللي كنا طول عمرنا بنتنطط باننا قابلين كل الاعراق والاديان وما عندناش اي مرجعية لا ثقافية ولا دينية تخلينا نتحامل على اي مختلف واننا اول دين ينص في كتابه المقدس على حقوق اتباع الاديان الاخرى وده حتى القرآن بيقول ان الاختلاف هو حكمة خلق الخلق "ولو شاء الله لجعل الناس أمة واحدة ولا يزالون مختلفين"، وعيب يا جدع احنا من زمااااان...هئ هئ هئ

فين؟ فييييييييييييييين؟ ايه الفرق ما بين منع المآذن وحرق بيوت مسيحيين بيصلوا فيها؟
فيه فرق: منع المآذن ارحم
انا عارفة، خلينا بقى نيجي دوغري ونقول اللي بيتقال في الاروقة: انت بتقارني ازاي يعني؟ انت مسلمة وللا مسيحية؟ احنا الدين الصح وهم غلط
(لاحظ اني مؤخرا بقيت اتسئل انت مصرية وللا جزائرية، فانا كده ح ابقى مسيحية جزائرية شيعية وكمان زملكاوية... اختصر وقول شمبانزي)

ما كل اصحاب دين شايفين نفسهم صح وغيرهم غلط، ما كل اصحاب دين عايزين دينهم يسود والناس كلها تدخله، ما كل اصحاب دين فاكرين نفسهم ان ربنا بيحبهم هم بس وبيكره بقية العالم، والمسيحيين المصريين معظمهم ارثوذكس، يعني مالهمش صاحب، لا المسيحيين الاوربيين الكاثوليك والبروتستانت بيحبوهم (وده جزء من عنصريتهم لان الارثوذكسية هي المسيحية الشرقية) ولا احنا هنا راحمينهم عشان "سهنات ومليانين خبث ولؤم ومستفزين" (ههههه انتوا مستفزين ليه؟)، واذا كنت شايف تبرير انهم عايزين مصر ده كافي لمنعهم من بناء كنائس او حتى توسيع الكنائس اللي موجودة ويوم ما يصلوا في بيوتهم الناس تخرج من صلاة الجمعة بمنتهى الروحانية تحرقهم، ويوم ما واد يحب بت ويمشوا في البطال قوم ابوها الصعيدي يسيبها عايشة (انا قلت انها ماتت طلعت عايشة) ويسيب الواد اللي عمل فيها كده عايش ويموت اي حد تاني غير البت والواد المهم انه يكون مسيحي، امال صعيدي ازاي ده؟ حتى الصعيد اتضرب؟ وللا ده كان احول ده وللا ايه حكايته؟ يبقى تبرير امريكا في احتلال العراق وافغانستان، وتبرير اوروبا في اضطهاد المسلمين بدعوى انهم عايزين الاسلام ينتشر في كل الارض اكتر من كافي... عايزين مصر؟ جتهم خيبة، هو حد دريان بمصر دي؟ يا عيني على خبثهم ولؤمهم واستفزازهم، عايزين مصر؟ ده ايه الطموحات اللي خرمت السقف دي؟ عايزين مصر؟ يا واد يا شيرز.. يا جامدين انتوا يا بتوع الاسود والنمور والسلاح المستخبي في بدروم الكنيسة والسحر الاسود والعفاريت اللي لابسة البنات يا صيع.. مصر؟ طب افتح بقك كده.. ع الاخر ع الاخر.. ادي مصر..كلها.. لو عرفت تبلعها من غير ما يجيلك تلبك معوي وقئ واسهال واميبا في معدتك ح اديك خمسة وسبعين قرش ياض ياللي ما يملاش عينك الا التراب ياللي اقصى احلامك توك توك بالقسط

امال اللي عايزين العالم (سوا مسلمين وللا بروتستانت وللا يهود) وكل واحد فيهم مستني المسيح ينزل عشان يكيد التاني ويقول له: شفت؟ انا اللي طلعت صح. وفي رحلة انتظارهم لنزول المسيح نسيوا دينهم من كتر الظلم

ووالنبي ارحمونا بقى من فزع الاندلس ده اللي شبه فزع الهولوكوست من غير مبرر، وكل ما تكلمهم يقولوا لك التنصير وعايزين مصر تبقى مسيحية، انتوا مش ناس مؤمنين؟ اللي ربنا عايزه ح يكون
بقى فيه ناس مؤمنة تحمي دينها بالظلم والعدوان والمعصية والقمع وتعمل في غيرها اللي ما تقبلوش على نفسها؟ وعايزين ربنا يسترها معاهم وفاكرين نفسهم مجاهدين؟ وفوق ده كله يتحلوا بنفاق منقطع الجماهير ولما يتعمل فيهم اللي بيعملوه في الناس يرقعوا بالصوت؟ ده على اساس اننا ايه يعني؟ مخلوقين من دهب وغيرنا مخلوق من جلة؟ احنا خلقنا ربنا وهم اللي خلقهم فردوس عبد الحميد؟ 
المثل المصري بيقول: الندل لما يحتكم يقدر ولا يعفيش
شفت اخضر كتير وقليل الا الاخضر اللي فوق قبة عينيك ده.. ما المسيحيين العرب موجودين في كل حتة، ما بنسمعش حد بيحرقهم ولا يمنع كنائسهم ليه؟ ماحدش يقول العراق عشان العراق تحت احتلال وده اقل واجب انهم يفقدوا صوابهم خالص بعد اللي اتعمل فيهم، انما المسيحيين العراقيين قبل الغزو كان اللي بيسري على بقية العراقيين بيسري عليهم، يعني المسيحيين اللي في بلاد الشام مثلا مش عايزين ينشروا المسيحية وهم المسيحيين المصريين بس اللي سهنات ومستفزين وولاد تيت؟ ليه؟ اشمعنى يعني؟ وبعدين ايه ينشروا المسيحية دي؟ ما احنا عايزين ننشر الاسلام
وسبحان الله، سبحان الله يا اخي، نفس اللي انا اعرفهم وبيبرروا منع المسيحيين من بناء كنائس هم هم اللي كانوا بيشتموا في الجزائر، الله، طب راح الاسلام فين بقى؟ مش انتوا بتوع الاممية الاسلامية؟ وللا انت بتدور على اي حد تفتري عليه وخلاص؟
هو الاسلام ده اكتشاف يا ناس؟ ده بقاله اربعتاشر قرن

انا عارفة ان المسلمين مضطهدين ومحتلين ومعذبي الارض وغلابة ومقتولين ومدبوحين ومحروقين ومغتصبين ستات ورجالة ومشتتين ومالهمش سند ولا ضهر في الدنيا غير ربنا ومتسلط عليهم كلاب السكك ودود الارض وحالهم شبه حال اليهود قبل الحرب العالمية واوحش كمان، وعارفة ان الاضطهاد والعنصرية بتخلق عنصرية مضادة وبتصيب الانسان بمرض انه عايز يعمل في الناس اللي بيتعمل فيه، وعارفة ان المضطهد مع طول الاضطهاد ما بيبقاش عنده الشجاعة انه يوجه غضبه للي بيضطهده وبيعوض ده بانه يستلقط له واحد اضعف منه ويتقمص شخصية اللي بيعذبه وينزل في الاضعف هبد، واليهود حصل لهم كده، وعلى فكرة المسيحيين المصريين الارثوذكس حصل لهم كده، بس على قدهم يعني، يعني مثلا بيكشروا في وش البروتستانت المصريين، رافضين وجود شهود يهوا في مصر خالص، بس ربنا مش مديهم صحة يعملوا اكتر من كده
بس ايه؟ ح نسيب نفسنا نعيا وللا ايه؟ يعني اليهود لما اتجننوا اهم اتناشر مليون ومع ذلك ممشينا نكلم نفسنا ويوم ما انداروا، انداروا على الوحيدين اللي كانوا بيعاملوهم كويس، بس احنا مليار ونص، مليار ونص مجنون في العالم كتير
انا امي علمتني من وانا صغيرة اني لما حد يعمل فيا حاجة افكر انا عملت ايه في مين وربنا بيخلص مني

حسوا بالناس بقى يا بتوع الاقباط صوتهم علي قوي وعايزين يتسكوا على دماغهم.. حسوا بغيركوا شوية عشان ربنا يرفع عنا الذلة والمسكنة دي

البر لا يبلي و الذنب لا ينسي و الديان لا يموت فافعل ما شئت فكما تدين تدان
----------
انتهى البوست القديم
بس انا مش عايزاكوا تتخضوا على نفسكوا، المجانين كتير والحمد لله، انا مش عارفة على اي اساس الراجل ده حكم على اوباما انه مسلم غير انه بيموت في المسلمين ومؤخرا المسلمين اتعودوا يموتوا بعض زي بني اسرائيل؟
وايه دولة المماليك اللي اسرائيل عايزة تعملها دي؟ بيخطفوا العيال ويقولوا لهم ارقصي يا جارية؟ هو داء التجارة في البشر ده مش عايزين يبطلوه ابدا؟ ده من ايام زمان قوي، حتى الافريكان امريكان شايلين في قلبهم ومعبيين منهم عشان اللي وردهم لامريكا يهود..ايه؟ هي دودة؟
والمانيا وفرنسا بيقولوا سويسرا معاها حق.. ياللا خلصونا واعملوا لهم هولوكوست خلينا نقب على وش الفتة بقى وربنا يكرمنا، الهولوكوست ده دايما بيبقى استفتاح لبن، ياللا ياللا، جنونا اكتر عشان نعمل لكوا زي اليهود اللي فقدوا وما بقيتوش عارفين تسيطروا عليهم، عكوا كمان وافتروا ومارسوا هوايتكوا القديمة في العنصرية وبعدين ارجعوا عيطوا وقولوا: يا دهوتي ايه اللي عملناه ده.. سوري سوري، بس المرة دي بقى مليار ونص، يعني ح يفتح بقه ويبلعكوا.. احنا زعلنا وحش



واستمرارا لمسلسل ع الباب انا ع الباب اللي بين مصر والجزائر الجزائر صوتت لمرشح مصر في المنظمة البحرية الدولية.. يابت بطلي تقل بقى، ما الراجل عمال يراضيك وانت راخرة بتشوفيه قاعد فين وتفضلي رايحة جاية قدامه وتعملي نفسك بتكلمي واحد تاني في الموبايل، وييجي يكلمك تقولي له: سم كده.. لو سمحت مالكش دعوة بيا.. انا اكرهك انا اكرهك ما اعرفش ليه انا اكرهك
---------
هييييييييييييه انا حاسة اني ح اموت زي هيباتيا، الجماهير الغفيرة ح تقشرني زي الموزة، بس انا مش باقدر امسك نفسي، يعني انت ما بتتغاظش يا كابتن انت وهو؟ ما بتتغاظش مثلا لما تشوف معلم بيضرب عيل مع ان العيل ده مش ابنك؟ ما بتتغاظش لما تسمع ولية بترقع بالصوت وجوزها نازل ضرب فيها مع انه مش جوزك ولا هي بنتك ولا اختك؟ ما بتتغاظش لما بلطجي بيتعافى على واد غلبان؟ ماهو مش معقولة ابقى عايشة كده مش حاسة بغيري لمجرد ان غيري كده من جنسية تانية وللا دين تاني، ده حتى الانسان كائن اجتماعي بيتفاعل.. كان بوزي اسكت وما اتفاعلش مع حد، ماهو اللي بيقول مالنا ومال العرب زي اللي بيقول مالنا ومال المسيحيين ما تخلينا في مشاكلنا، برافو عليهم والله، بس هم بجد مش حاسين بحاجة خالص كده؟ وللا بيضحكوا عليا؟ طب ماييجوا الاكاديمية معايا، ده احنا طول النهار رأفت الميهي عمال يقول لنا: حس حس.. اهم حاجة تبقى بتحس مش مهم تفهم قوي اذا كنت بتحس قوي، لكن لو كنت بتفهم من غير ما تحس روح اشتغل مبيض محارة حس حس حس.. لما خلانا كلنا في حالة سنتمنتالية مهترئة

وادي رقصة المجنونة يابا يابا ع اللمونة

مهدي وميدو جابوا لي خبر ان قناوي بعد ما حط السكينة على رقبة هنومة قام عم مدبولي لبسه بدلة الفرح وحطه في عربية الاسعاف

آخر خبر كان امبارح لما عرفت ان مصر انسحبت من تنظيم كاس الامم لكرة اليد وقالت يا انا يا هي

قامت الجزائر قالت لها: ولا يهمني، اني معايا الواد.. اني ام الواد

قامت مصر قفشت الاتحاد الافريقي وقالت له: في الزريبة يا ناقص؟

قام الاتحاد الافريقي قال لها: النسوان على قفا من يشيل

قامت مصر قعدت تعيط وتقول له: انت لسة بتعزني زي الاول يا عمدة؟.. قام قال لها: واكتر من الاول، كل ما بتكبري بتتصبي وتحلوي

قامت قالت له: الليلة يا عمدة.. قام قالها: هي حباكات؟ قامت رايحة للجزائر وقالت لها: نامي لوحدك يا دلعدي

خلااااص، خلاصص، هوووو.. ماما زمانها جاية، جاية بعد شوية

 

.... بلدي اتهبلت يا رجاااااالة

معلش.. ح نعمل ايه؟ امكوا اتجننت يا ولاد، ح نرميها يعني؟ نقل اصلنا معاها؟ اتجننت ولبست بنطلون بيجامة وشبشب حمام مقطوع وفوقيه بالطو جدها المقطع اللي عليه نياشين مصدية وبرنيطة امها جلفدان هانم اللي فيها ورد وماشية تقول: انا بكيزة هانم الدرمللي بنت الدرمللي باشا شيرين وعمالة توري الناس صورة جدها وهو بياخد النيشان من جلالة الملك وتقول لهم ده جدي انا خريجة مدرسة بارل فو فرانسيه ديمي سيزون الا جارسون بيتي بان ساكلامان جاتو سواريه آليه آليه إيلنيابا دارجان باسيه كومبوزيه انشانتيه..مساء الخير.. مساء الخير.. وهو كذلك

ربنا يشفي كل مريض... ما تقعدوش تغيظوها بقى وتخلوها تحدفكوا بالطوب.. احسن تقتل لكوا هنومة

خلاص، الوقت اللي ينفع كانت تتحاسب فيه على افعالها عدى من تلاتين سنة، وانتوا طلعتوا ولاد اصول وما اذيتوهاش... ولو ان فترة المقاطعة اللي بعد كامب ديفيد دي لو كانت كل الدول العربية اتفقت علينا كانوا عرفوا يئذونا ويرجعوا العمالة المصرية ويلعبوا في حصتنا في مية النيل ويدخلوا لنا من الحدود اللي اسرائيل بتدخلهولنا دلوقت واحنا عاملين معاها سلام، لكن ما قلوش اصلهم وهي بعقلها، ح يقلوا اصلهم لما اتجننت؟ مش معقول يعني

لا وايمان داخلة تغيظ قناوي وتسيب لي لنك خبر العبارة والجزائريين عمالين يعزوا المصريين وياخدوا بخاطرهم.. لكن لااااااا، يعزوا المصريين ده ايه؟ انت داخل في عقلك انك تعرف تضحك على زكي بشكها؟ فوق لنفسك، انت مش حمل زكي بشكها، انت مش قد زكي بشكها، هو بعد ما كاس العالم اتجوزكوا عليهم ح يقبلوا منكوا حتى عزا

طب مصر ح تنظم كاس الامم الافريقية لكرة اليد، طب لما المشجعين الجزائريين يحبوا ييجوا ح يعملوا ايه؟ انا اقول لهم

يسألوا على عنوان فردوس عبد الحميد، ويروحوا يقفوا تحت البيت بتاعها، بتاع تلاتين واحد كده واول ما يشوفوها نازلة يروحوا كلهم قالعين البنطلونات في نفس واحد، ويستحسن لو يربطوا البنطلونات في حبل واول ما يشوفوها يروح واحد شادد الحبل ويجيبوا نسوان تزغرد

جنان بجنان بقى، الفريق الجزائري لكرة اليد يجي كله ناكش شعره ولابس بنطلون رجل ورجل وفردة جزمة كوتشي وفردة شبشب حريمي بكعب، ويضربوا بلانصات في الهوا

ابراهيم عيسى ملعلع اليومين دول

لنك المقال

الراجل ده عنده

mission

انه يكسفنا ويزغد فينا يمكن نحس على دمنا ونقعد نذاكر بدل الصرمحة على القهاوي والوقوف على ناصية الشارع ومعاكسة اللي رايحة واللي جاية.. انا مش عايزاه يكتب الكلام ده في الدستور، انا عايزاه يعمل بورنامج تلفزيوني فضائي ويقول الكلام ده ويفتح التليفونات ويرد على الناس عشان يفهمهم بالراحة، مش كل الناس بتعرف تقرا، واللي بيقروا مش هم المهمين، المهمين الحقيقيين اللي ما بيعرفوش يقروا، دي شغلانته انه ياخد باله منهم، وكتير من اللي بيقروا مش بيفهموا هو قصده ايه، مش عشان هم اغبيا ولا حاجة، مافيش حد غبي في مخه، بس فيه غباوة قلب، غشاوة على القلب بتخلي الناس تفهم اللي هي عايزة تفهمه مش المقصود من المقال، وده واضح من بعض التعليقات اللي بتتساب له، مع انه بيحاول يكتب بابسط اسلوب ممكن وهو يقدر يكتب باسلوب يعقد الناس، انا قريت له روايتين وعارفة لما يحب يكتب باسلوب ادبي مرتفع بيقدر، بس هو متعمد يبسط قوي، وبرضه فيه ناس بتتغابى، لازم يطلع يقول للناس الكلام ده ويفتح التليفونات عشان يدي فرصة للناس انها تتغابى قوم هو يرد على الغباوة بالراحة ويفصص المقصود، الناس محتاجة كده، ومدام هو اخد على عاتقه انه يبقى ابوهم وشايف في نفسه انه يقدر يصبر عليهم يبقى يحاول يوسع اكتر من كده عشان يوصل لاكبر قدر من الناس، وهو ربنا مديله موهبة انه بيعرف يفهم ويكسر الحاجة لقطع صغيرة عشان الناس تهضمها، انشالله يخلي عصام ده يفتح له قناة فضائية مخصوص ويسميها الدستور

مدام الدستور بتوزع كجرنال يبقى اكيد ح يبقى عليها اقبال اكبر كقناة فضائية، واللي عنده في الجرنال يعملوا برامج، بس هو يعمل برنامج هوا ويكلم الناس وياخد ويدي معاهم في الكلام بالراحة كده، ولو محتاجين زعيق يزعق لهم، هو بيعرف يكلمهم ازاي، والناس بتسمع له... مش معقولة يعني يسيبهم لمصطفى عبده خريج تانية اعدادي، مدام ابوهم يبقى يعمل زي ما الابهات بتعمل، لو ح يمشي ورا البت وهي رايحة المدرسة ويستناها لما تخلص يعمل كده، المهم حالها يتعدل
انا لو اعرف اوصل له الاقتراح ده بنفسي كنت عملت كده، بس مافيش وسيلة اوصل له الكلام ده، حد بقى يقول له... يفكر في الموضوع، يا اما يبقى مقصر في حقهم، هم محتاجين درس خصوصي، مش كفاية الفصل بتاع المضرصة والمجموعة

اليكم المقال:

القدس.. هل تأتي سيرتها في تليفونات الرئيس؟


جاءت من الغريب ولم تأت من حكومتنا المصرية ولا من سفارتنا ولا من خارجيتنا المصرية التي تتمتع بحفلات كوكتيل ممتازة في تل أبيب!


اجتمع منذ أيام قناصل أوروبا في إسرائيل ووقعوا علي وثيقة تفضح وتكشف وتعري العدوان الصهيوني علي مدينة القدس!


كانت الوثيقة واضحة وقد يكون لها أثر هائل في الرأي العام الأوروبي، لكن السؤال أين مصر من كل هذا؟


لم نسمع يوماً الرئيس مبارك في مؤتمر صحفي علني أو في خطبة رسمية أو حتي في حوار مع محطات تليفزيون غربية أو مصرية وهو يتحدث عن تفاصيل العدوان الإسرائيلي المستمر علي القدس ولا هو كشف معلومات ولا قال أرقاما ولا عرض خرائط ولا وجه ولا حذر ولا أنذر ولا هدد.


الثابت أن الرئيس مبارك في تصريحاته عن إسرائيل مرتكز علي:


-الحديث باعتباره حريصاً علي مصلحة الشعب الإسرائيلي وأن كلامه مخلص في النصيحة ويصب في فائدة المواطن الإسرائيلي وكأن أي واحد في تل أبيب سوف يصدق أن الرئيس مبارك حريص عليه أكثر من قادة بلاده!!


-الإدانة الهامسة لإسرائيل وبطريقة تقليدية وعادية بحيث فقدت أي معني لها عند أي طرف فلا إسرائيل تعيرها اهتماماً بل وتحسها إدانة بروتوكولية خصوصاً وهي تأتي دائما في سياق نصيحة لحكومة تل أبيب، أما الشعب المصري فلا يكاد يسمع الإدانة تخرج من فم الرئيس أصلاً ويمكنك أن تلاحظ الأداء الصوتي للرئيس حين يهاجم إيران وتقارنه بأدائه حين ينتقد إسرائيل، وبالمرة يا ريت تاخد بالك من حديث جمال مبارك عن إسرائيل، حيث تشعر أن هناك شريط تسجيل آليًّا يتكلم بدلاً عنه وكأنك تسمع بريداً صوتياً لدليل التليفون!


- تقديم مصر وكأنها طرف محايد غير منحاز لأي من الطرفين وأن مصر لا يهمها سوي تحقيق السلام، وهو ما يثير التساؤل حول حقيقة حياد مصر.. فهل هناك حياد بين القاتل والقتيل؟ وهل هناك حياد يا سيادة الرئيس بين صاحب الحق ومغتصب الحق؟


- بث الطمأنينة في نفوس الحكم والشعب الإسرائيلي بأن المقاومة المسلحة لن تجدي نفعاً ولن تفعل شيئاً وأنه لا حل إلا مائدة المفاوضات وهو ما يجعل العدو الإسرائيلي في حالة اطمئنان كامل ومطلق، فمصر لا تؤمن بجدوي المقاومة ولا تساندها ولا تدعمها بل تعطلها وتعوقها وتحاصرها وتجبرها علي الدخول في حظيرة الترويض!!


- لا تظهر القدس علي قائمة اهتمامات الرئيس في خطبه أو تصريحاته أو مؤتمراته كما لا تشكل اهتماماً خاصاً لدي مسئولي مصر فلا مصر تتابع بدراساتها ما يجري في القدس ولا تقدم مشروعات عربية ودولية لكشف التعديات والعدوان الإسرائيلي اليومي السافر والسافل علي القدس ومقدساتها وبيوتها العربية وسكانها وأهلها الفلسطينيين، بل لم يخرج علينا الرئيس مبارك ذات مرة وعلي مدار الثمانية والعشرين عاماً الماضية مخصصاً خطاباً أو بياناً للقدس أو المسجد الأقصي علي كثرة ما يحدث كل ساعة من عدوان صهيوني عليهما!


يأتي هذا كله في الوقت الذي يتحرك فيه مسئولو وممثلو الدول الأوروبية فقد نشرت صحيفة «هاآرتس» الإسرائيلية الأربعاء الماضي، تقريراً وصف بأنه «سري» وضعه قناصل دول الاتحاد الأوروبي في القدس ورام الله، مشيرة إلي أنه يوجه انتقادات حادة لسياسة إسرائيل في القدس الشرقية، ويدعو الاتحاد الأوروبي إلي اتخاذ إجراءات كثيرة احتجاجية ضد إسرائيل، وفرض عقوبات علي جهات ذات صلة بالنشاط الاستيطاني في المدينة وفي محيطها.


وبحسب الصحيفة فإن التقرير، الذي ينشر للمرة الأولي، هو وثيقة حساسة جداً وتم عرضه قبل عدة أيام في جلسة مغلقة في مؤسسات الاتحاد الأوروبي في بروكسل.، وكانت الخارجية الإسرائيلية تخشي نشر التقرير في وسائل الإعلام نظرا للأضرار الشديدة التي قد يسببها لإسرائيل في الرأي العام الأوروبي.، وبحسب التقرير فإن الحكومة الإسرائيلية وبلدية القدس تعملان بموجب «استراتيجية ورؤية» تهدف إلي تغيير الميزان السكاني في المدينة، وتقدمان المساعدة لجمعيات المتطرفين من أجل السيطرة علي المدينة خاصة منطقة الحرم الشريف.وجاء في التقرير أيضا أن مؤسسات خاصة تعمل علي امتلاك بيوت في الأحياء العربية، وتحاول زرع مستوطنات يهودية داخل هذه الأحياء. وأشار التقرير إلي أن «الحفريات في البلدة العتيقة ومنطقة الحرم تتركز أساساً في التاريخ اليهودي، وأصبح علم الآثار وسيلة أيديولوجية لصراع قومي وديني. وتجري إدارة هذا الصراع بطريقة تغير من هوية وطابع المدينة، بما يهدد الاستقرار فيها»، وأشارت صحيفة «هاآرتس» إلي أن التقرير يتضمن توصيات تهدف إلي التأكيد علي أن القدس الشرقية هي العاصمة المستقبلية للدولة الفلسطينية.


إذن حتي الغرب يتحرك ويحس علي دمه ويثور ضد جرائم إسرائيل بينما مازالت مصر تتحدث مع إيهود باراك في التليفون، حيث تحب مصر جداً أن تسمع وزير الحرب الإسرائيلي يشيد بحكمة الرئيس مبارك وهو صادق فعلاً في إشادته فماذا كانت ستفعل إسرائيل فعلاً من غير حكمة الرئيس مبارك؟!

------------

وعلى فكرة، يارب تكون خلفته كلها صبيان فعلا، ده لو مخلف بنت فعلا ح يسيب شغله ويمشي وراها ههههههههههههه

امير البحار

شفته على النت، الحمد لله اني ما شفتوش في السينما، لو كنت دفعت فيه فلوس كنت ح احس اني اتلسعت على قفايا

يا سبحان الله، ولا حتى يضحك، انا باحب الهيافة والهبل، بس تبقى حتى دمها خفيف